Отпорно Скопје: поголема одржливост и иновации за справување со климатските промени

Една третина од вкупното население на Република Македонија живее во градот Скопје, а голем број жители од регионот и пошироко исто така секојдневно патуваат кон главниот град. Еколошкиот отпечаток на градот е неповолен, а загадувањето на воздухот се покажа како драматична закана по здравјето, за која не постои лесно решение. Покрај тоа, граѓаните бараат јавни услуги кои се поевтини и со повисок квалитет отколку во минатото.

Проектен документ - Зголемување на урбаната отпорност со примена на ИКТ за вклучување на намалувањето на ризиците од катастрофи и климатски промени во главните текови во Ерменија, Македонија и Молдавија

предизвик

Брзиот урбан раст од таков обем создава два главни предизвици: еколошка одржливост и испорака на јавни услуги. Задоволувањето на потребите на таков голем и променлив број на жители и патници е голем предизвик за градската администрација. Вработените во општината имаат полни раце работа обидувајќи се да се справат со секојдневните предизвици и многу малку време за планирање однапред.

Иако градот се стреми кон тоа да одговори на овие предизвици, неговите ресурси се ограничени. Тековниот систем за управување не е конфигуриран да одговори брзо на овие зголемени барања и да обезбеди услуги кои ги задоволуваат зголемените стандарди и очекувања на жителите.

активности

За да одговори на овие предизвици, да стане поотпорен на климатските промени и други еколошки закани, Градот Скопје со поодршка на УНДП ќе работи на дизајнирање и испорака на подобри услуги за своите граѓани. Предвидени се група приоритетни мерки идентификувани во Стратегијата за климатски промени „Отпорно Скопје“ и Рамката за иновации на Град Скопје:

1. Воведување на иновативни пристапи во секојдневна работа на Град Скопје, дизајнирање и испорачување на подобри и поефикасни услуги за своите граѓани

2. Спроведување на потребните истражувања за унапредување на локалната агенда за животна средина

3. Воспоставување на модели за унапредување на урбаната отпорност и тестирање на неколку такви модели за да се обезбеди доказ за концептот

резултати

Администрација на град Скопје со нови пристапи и техники ќе дизајнира и испорачува услуги
Зајакната соработка со граѓаните и бизнисите за подобрување на јавните услуги
Дизајнирање/редизајнирање на две услуги за зголемување на задоволството на граѓаните кои ја користат таа услуга
Изработка на мапа на биотопи за Скопскиот регион
Развивање инвентар на крајбрежни живеалишта (водни живеалишта) и Акционен план за агломерација Скопски регион
Развој на основен Проект за воспоставување на зелен коридор по текот на реката Серава
Развој на Студија за подземните води за агломерацијата Скопски регион
Идентификување на можните патишта за пренос на шест валентен хром во подземните води на планината Жеден и нивното влијание врз изворот Рашче
Надградба на Зелен катастар за град Скопје преку инвентаризација на дополнителни дрвја и грмушки
Изградба на зелен покрив на ГТЦ
Озеленување на Скопско кале
Проектирање и спроведување на активности за подигање на јавната свест за горење на отпадот и користење на загадувачки извори на топлинска енергија